Baguio, at sa mga Naglalahong Kwento

Tinagpas na ang mga alaala ng ating kamusmusan
Mga sugatang bisig ay di na muling lalambitinan,
Mayayakap at masisilungan.
Tanod na lilim sa ating mga paglalakbay
Sa gunita’y hinahanap at ngayo’y nahingalay.

(Crystal Cave, Camp John Hay, Longlong, Sto. Tomas…
Ginapang, ginahis, ginuho ng dambuhalang
Makina ng kasakiman at kaunlaran )

Hinigop, sinaid ang batis ng mga payak na pananaw
Bitak-bitak na ang bulaos na ating tinunton sa pagtatampisaw
Mumunting pangarap ay inilibing,
Tinayuan ng mga pangakong sinungaling
Binasbasan ng hungkag na simulain.

(Kennon, Loakan, Ambiong, Guisad…
Hahampas ang tag-ulan sa kanilang dibdib
Walang matanaw na agos pagkat naglaho ang landasin)

Kulimlim, mapanglaw ang mga dapithapon
Nahilam ang papawirin
Sa usok ng pagbabanyuhay
Sinakmal ng mga kongkretong halimaw
Ang mapaglarong hangin.

Tinagpas na ang mga alaala
Sinaid na ang pag-asa
Binibilang ko ang mga taon
Nang huling narinig ang mga kwento
Saan na humantong ang mga yapak?

Nakapinid na ang panahong tahimik
Mga lumang palatandaan ay di na maibabalik
Ngunit narito pa rin ang mga lansangan
Tuntunin, kilalaning muli
Abangan ang mga mukha
Bagong tinig na hihilom
Sa mga sugatang alamat.

-tula ni Luchie Maranan

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s